رسالتي لرفيق العمر

 بمناسبة اللي بيحصل من اللي بيطلقوا علي نفسهم اسم بلوجرز في الفترة الأخيرة دي وبيسمي :

( ترند المشاكل الزوجية )

ان كل بلوجرز متجوزين يفتعلوا مشاكل زوجيه سواء مشاكل مادية أو خيانة أوغيرها سوا توصل بيهم لتراشق الاتهامات والالفاظ أحيانا وتدخل الاهالي وممكن توصل للطلاق كمان ودا كله بمشاركة الفانزات اللي بيتبعوهم وبيتابعوا كل تفاصيل حياتهم لحظه بالحظه بكل شغف واهتمام بمحتواهم دا وفيه بعض البنات بيوصل بيهم الحال لانبهارهم بحياتهم المزيفه انهم يتخذوهم قدوة ليهم ودا الجانب الأسوأ من المشكله

ان البنات ينخدعوا في أمثالهم و يخدوهم قدوة مش عارفه علي ايه اصلا وينخدعوا ان حياتهم المزيفه اللي بيظهروها ليهم دي هي الحياة المثالية اللي بيتمنوها

طول عمرنا اهالينا بيعلمونا وبنتعلم منهم ازاي نحافظ علي حرمة البيوت وستر عوراتها مش حياتنا وتفاصيلها كلها علي مرئى ومسمع العامة كده بدون اي تحفظات وان البيوت أسرار وإن اللي بين الزوج والزوجة مينفعش شخص تالت يعرف عنه حاجة ولا أب ولا أم ولا أخ ولا أخت ولا صحاب مش متابعين من كل العالم وتضحكوا علي نفسكم بجملة دول عيلتنا الكبيره ولازم يعرفوا عنا تفاصيل حياتنا ، وعند الخصام تجنبوا الشكوي للآخرين واقعدوا مع بعض اشكوا لبعض منكم، وابتعدوا عن العِند إحنا مش في صراع واتكلموا بالحُب والوَّد والرحمة في العتاب و متسمحوش لحد إنه يتدخل في حياتكم الشخصية نهائي وابذلوا كل المجهود اللي تقدروا عليه بس عشان شريك حياتكم وأهل بيتكم يعيشوا معاكم في أمان وطمانينه مش نتناول مشاكلنا الخاصة على مواقع التواصل الاجتماعي بالشكل والكلام المهين دا علشان الترند اللي مش بتاخدوا منه في الاخر غير الاهانه ليكم افرضوا ربنا صلح الحال بينكم هترجعوا تعيشوا مع بعض ازاي بعد التجريح وقلة الأدب وحرب السوشيال ميديا دي ولو دي اشتغاله زي ما بيعمل البعض علشان الريتش واقع ومفيش مشاهدات فتغور الفلوس اللي تيجي من الاهانه وكشف الستر والفضايح حوارتكم بقيت تمرض بجد الله يصلح حالكم ويهديكم ويبعد اخباركم وحوارتكم عننا وعن أجيال طالعه مبهوره بيكم وربنا يستر عليهم من الانبهار الكداب وقدوة مزيفه كمحتوي معظمكم مش الكل منعا للتعميم

#يوميات_فاطيما